«Barselona» klubi navbatdagi braziliyalik iqtidor egasining transferi borasida kelishuvga erishdi. "San-Paulu" jamoasining 19 yoshli yarim himoyachisi Gustavo Mayya yozgi transfer paytida Kataloniyaga ko'chib o'tadi. "Ko'k-anorranglilar" futbolchining ustuvor huquqi uchun 1 million evro to'lashdi. Kelishuvga ko'ra, "Barsa" shu yilning 15 iyuliga qadar yana 3,5 million evroni "San-Paulu" hisob-raqamiga o'tkazib berishi kerak. Mayya "San-Paulu" klubining asosiy tarkibida debyut qilmagan. "Barselona" skautlari uni yoshlar jamoalari o'rtasidagi o'yinlarda kashf qilishgan. Chap qanot yarim himoyachisi San-Paulu shtatining yoshlar kubogi musobaqasida 7ta o'yinda 3ta gol urgan.